琴晚返到屋企，女友考試完了兩科可以暫休所以話煮飯，見有 D 菜諗起鼠鼠們同埋兔仔都鍾意食，於是就從揀出來準備唔要的部份慢慢分。去到鼠籠前見到有 D 唔對路，有食物但只得珍寶同帶子兩個衝出來，雞子仍然原地不動。女友望一望就知道雞子原來早已升天，而帶子一直都係原地陪佢睡覺直到我返屋企，初步估計係中午打後雞子先離開的。

    其實琴晚半夜三點幾，我見涼風陣陣，怕鼠鼠們會凍，所以攝幾張紙巾入去，三隻鼠都第一時間好似裝修工人上身咁不斷扯住紙巾周圍搵靚位鋪，見住雞子動作慢但仍堅持實在係老而不退的表現。今朝早如常地餵水餵食（因為佢唔方便舉高身體去水樽飲水，所以我呢兩個星期 keep 住每日係屋企有空閒就直接餵水同 D 濕水食物），見佢不太有興趣吃喝，其實未有預料到原來係佢升天的前奏。

    自從魚旦仔差不多兩年前離世後，無幾耐女友帶珍寶同帶子返來，估唔到變成雞子+帶子同埋牛丸+珍寶兩陣營，珍寶真係好識照顧同伴，呢一年半大部份時間都選擇同地方而睡，試過冬天我見屋仔比較迫放多一個引其中一個入去，結果一係兩個一齊搬屋，一係兩個一齊唔搬，而到最後呢段日子帶子九成時間都會用身體遮住雞子為佢取暖。而雞子今次就係睡夢中離開，當我將雞子放另一邊等候處理期間見到女友放返入去的帶子不斷嘗試推雞子，似係想叫佢起身，見到咁樣我個心都好酸....

    或者鼠鼠們都有靈性，自從返呢份工後耐不耐都有 trip，記得舊年我去新加坡工幹想帶同女友去但又擔心交牛丸仔俾朋友照顧會無咁好的時候，佢就先行一步；我下個月去美國公幹幾個星期，亦好擔心雞子會得唔到足夠細心的照顧，所以遲遲未定好行程，估唔到雞子就係呢個時候同我道別....

    雞子...你係目前為止唯一同過我渡過了三次生日的倉鼠，呢 24 個半月相處中雖然我對你的動靜不太了解（一直以來你都好驚青咁，次次我都捉你唔到，只有女友可以），但我都係好唔捨得你，只係見你毫無痛苦地在睡夢中離開，我覺得好欣慰。記得以前我將魚旦仔、牛丸同埋雞子呢幾個合稱 "狂歡三寶"，隨著雞子離開塵世，狂歡三寶呢個組合終於在天國再聚頭。雞子，請你安息吧，如果可以的話我會將你放回牛丸身邊的，你只管到彩虹橋找回魚旦仔同牛丸繼續玩樂吧。我同女友會繼續好好睇住珍寶同帶子的....