呢兩隻倉鼠，係近兩年前魚旦仔死後大約一星期由女友帶回來，好奇怪地兩個住埋無耐就經常有「爭執」，同一時間佢兩個各自都能同牛丸/雞子當中的一個好好相處，於是就安排了「牛丸 + 珍寶」及「雞子 + 帶子」呢兩個組合，並以一個一屋兩伙分隔的籠放埋一齊。呢個組合進行了一年多一點點牛丸離世，再半年後雞子亦離世，兩者都係活了兩年多，算係比平均壽命長一點。不過雞子走了之後，變成珍寶同帶子兩個孤獨地分開住，實在有少少覺得難過...

　　琴日找回之前用過的大籠，其實個大籠曾經係魚旦牛丸同雞子之聚居地，係後來發生牛丸同魚旦經常打交先無再用。我知道珍寶係唔喜歡雞子的，不過而家都走了，我估計帶子身上帶有的雞子氣味呢幾日都應該消散，所以大膽地試下放兩個再次一齊，竟然又真係 OK。帶子向來只係為食精一名，唔打交的，只要珍寶唔出手應該就掂，而最終珍寶都無出手，仲肯同帶子一齊訓覺添~~

　　從毛色光澤來睇，原先我估計應該最長壽的應該係帶子，因為超肥乜都食，歲半仍有力氣爬籠，但近期見到似乎佢衰老得比較快。如果我所養的倉鼠只有兩年多一點的壽命，咁珍寶同帶子呢個「同居」生活或者只剩低半年左右，希望佢兩個能夠繼續相安無事地渡過餘下的日子啦...